ओबीसी विद्यार्थ्यांचे वसतिगृह खुले करून दिल्यामुळे सहायक संचालक निलंबित

निलंबन मागे न घेतल्यास राज्यभर ओबीसी संघटनांचा आंदोलनाचा इशारा

वणी : दोन वर्षांपासून प्रलंबित असलेले नागपुरातील ओबीसी विद्यार्थ्यांचे वसतिगृह गेल्या १६ ऑगस्ट रोजी विद्यार्थ्यांसाठी खुले करून देण्यात आले. विद्यार्थ्यांनी याचा आनंद साजरा करीत स्वतः रिबीन कापून त्याचे तात्पुरते उद्घाटन केले परंतु शासनाचा शिष्टाचार पाळला नाही म्हणून इतर मागास बहुजन कल्याण नागपूर विभागाचे सहायक संचालक राजेंद्र भुजाडे यांना निलंबित करण्यात आले आहे. या घटनेमुळे ओबीसी संघटना संतप्त झाल्या असून त्यांनी भुजाडे यांचे निलंबन तातडीने रद्द न झाल्यास राज्यभरात तीव्र आंदोलनाचा इशारा ओबीसी जातनिहाय जनगणना कृति समिती वणी मारेगाव झरी ने दिला आहे.

याबाबतचे निवेदनही शासनाला उपविभागीय अधिकारी वणी मार्फत सादर केले आहे.सविस्तर वृत्त असे कि,ओबीसी विद्यार्थ्यांचे वसतिगृह गेल्या दोन वर्षांपासून बंद आहेत.वसतिगृह सुरू करण्याबाबत शासनाच्यावतीने दरवेळी वेगवेगळ्या तारखा जाहीर करण्यात आल्या. मार्च २०२४ मध्ये वसतिगृह सुरू होतील म्हणून नागपूर येथे तीनशेच्या वर विद्यार्थ्यांनी अर्ज केलेत. परंतु ३१ जुलैपर्यंत वसतिगृह सुरू न झाल्याने विद्यार्थ्यांनी त्या इमारतीसमोर आंदोलन केले. तेव्हा १५ ऑगस्टपर्यंत वसतिगृह सुरू होतील, असे आश्वासन सहायक संचालक इतर मागास बहुजन कल्याण विभाग नागपूर यांनी विद्यार्थ्यांना दिले होते. त्यासंबंधीचे पत्रसुद्धा विद्यार्थी संघटना आणि शासनाला दिले होते.परंतु १५ ऑगस्टला सुद्धा वसतिगृह सुरू न झाल्याने १६ ऑगस्ट रोजी विद्यार्थ्यांनी स्वतःच उद्घाटन करून वसतिगृहात प्रवेश केला. तेव्हापासून भुजाडे यांना वरिष्ठ पातळीवरून वसतिगृहाचे उद्घाटन परस्पर कसे झाले? अशी विचारणा झाली आणि राजशिष्टाचार पाळला नाही असे कारण देऊन निलंबित करण्यात आले. यामुळे ओबीसीच्या संघटनांमध्ये असंतोष पसरला आहे. ओबीसी जातनिहाय जनगणना कृती समिती वणी मारेगाव झरी यांनी 26 ऑगस्ट रोजी उपविभागीय अधिकारी वणी यांच्या मार्फत मला मुख्यमंत्री महाराष्ट्र राज्य यांना निवेदन पाठविण्यात आले. मागणी मान्य न झाल्यास राज्यभर तीव्र आंदोलन करण्याचा यावेळी इशारा देण्यात आला.यावेळी निवेदन देतांना मोहन हरडे, गजानन चंदावार, पांडुरंग पंडिले,सह इतर ओबीसी बांधव उपस्थित होते.