रान डुकरांचा हैदोस, मुकुटबन येथील शेतकऱ्यांचे लाखो रुपयाचे नुकसान

सम्पूर्ण शेताची नासाडी, कापसाचे उभे पीक जमीनदोस्त, वनविभागाचे दुर्लक्ष, शेतकरी नुकसान भरपाईच्या प्रतीक्षेत

झरी :तालुक्यातील मुकुटबन येथील विठ्ठल दासरवार या शेतकऱ्याच्या सम्पूर्ण शेताची रान डुकराने नासाडी करून उभे कापसाचे पीक जमीनदोस्त केल्यामुळे शेतकऱ्याचे लाखो रुपयाचे नुकसान झाले आहे. हाता तोंडाशी आलेला घास वन्य प्राण्यामुळे हिरावून घेतला गेला आहे. अगोदरच शेतकरी अस्मानी आणि सुलतानी संकटामुळे ग्रस्त आहे त्यातच वन्य प्राण्याचा हैदोस वाढत असल्याने शेतकरी हवालदिल झाला आहे. रान डुकरं मोठ्या प्रमाणात शेतात शिरकाव करून शेत पिकाची नासाडी करीत असल्याची माहिती संबंधित शेतकऱ्याने वन विभाग मुकुटबन यांना वारंवार देऊन ही वन विभागाने याकडे दुर्लक्ष केले. जर वन विभागाने या वन्य प्राण्याचा बंदोबस्त केला असता तर आज या शेतकऱ्याचे नुकसान झाले नसते. विठ्ठल दासरवार यांनी वन विभागाने नुकसान भरपाई द्यावी व वन्य प्राण्यांचा बंदोबस्त करावा अशी मागणी केली आहे.