भद्रावतीचे तहसीलदार लाचलुचपत प्रतिबंधक विभागाच्या जाळ्यात..!

भद्रावती : भद्रावतीचे तहसीलदार डॉ. निलेश खटके यांना एका वीटभट्टी व्यावसायिकाकडून 25 हजारांची लाच घेताना नागपूर येथील लाचलुचपत प्रतिबंधक विभागाने ताब्यात घेतले. ही कार्यवाही आज दिनांक अकरा रोजी शनिवारला केली असून वृत्त लिहिस्तोवर ही कारवाई सुरू होती. या मोठ्या कारवाईने भद्रावती शहरात एकच खळबळ उडाली आहे. शहरातील एका वीटभट्टी व्यावसायिकाने वीटभट्टी व्यवसायासाठी तालुक्यातील घोटनिंबाळा शिवारातील एका शेतातील मातीचे उत्खनन करण्याची परवानगी मागितली होती.याची कार्यवाहीही पूर्ण झाली होती. मात्र तहसीलदार परवानगी देत नव्हते. ही परवानगी देण्यासाठी खटके यांनी 25 हजाराची लाच मागितल्याचा आरोप आहे. याची तक्रार सदर व्यवसायिकांने नागपूर येथील लाचलुचपत प्रतिबंधक विभागाकडे केल्यानंतर सापळा रचून खटके यांना लाच घेताना रंगेहाथ ताब्यात घेण्यात आले. याबाबतची अधिक चौकशी नागपूर लाचलुचपत विभाग करीत आहे.