धक्कादायक ! आठवीत शिकणारी शाळकरी मुलगी 9 आठवड्यांची गर्भवती, 23 वर्षीय युवकाकडून अत्याचार

मारेगाव तालुक्यातील धक्कादायक घटना, सदर घटनेमुळे इतर पालकांनी सतर्क राहण्याची आवश्यकता

मारेगाव : तालुक्यातील एका शाळेत इयत्ता 8 व्या वर्गात शिक्षण घेणाऱ्या  14 वर्षीय मुलीला प्रेमाच्या जाळ्यात ओढून तिच्यावर 23 वर्षीय मुलाने सतत अत्याचार केला. यात ती मुलगी दोन महिन्यांची गर्भवती राहिली असल्याचे सूत्रांच्या माहितीनुसार निष्पन्न झाले.

सविस्तर वृत्त असे की,मुलीच्या पोटात दुखू लागल्याने मुलीला तिच्या आईने रुग्णालयात दाखल केले असता हा धक्कादायक प्रकार उघडकीस आला. याप्रकरणी मारेगाव पोलीस ठाण्यात गुन्हा दाखल करण्यात आला असून पोलिसांनी 23 वर्षीय युवकाला ताब्यात घेतले आहे. कोर्टाने सदर आरोपीला तीन दिवसांची पोलीस कोठडी ची शिक्षा सुनावली आहे.

सविस्तर  माहितीनुसार 14 वर्षीय पीडित मुलगी ही मारेगाव पोलीस ठाण्याच्या हद्दीत राहत असून ती शहरातील एका शाळेत शिक्षण घेत आहे. तर पोलिसांच्या ताब्यात असलेला आरोपी प्रणव महादेव राऊत हा तालुक्यातील केगाव (मार्डी) येथील रहिवासी आहे.

गेल्या काही एक वर्षापासून दोघांमध्ये ओळख होऊन मैत्री झाली. नंतर दोघांचे प्रेम संबंध जुळले. त्यानंतर नेहमीच आजोबांच्या गावाला आली की पिडितेला धमकावून 23 वर्षीय प्रणव राऊत हा अत्याचार करत असल्याचा आरोप केला आहे.  मात्र यामुळे काय घडेल त्याची कल्पना दोघांना नव्हती. त्यातच अत्याचारामुळे पीडित अल्पवयीन मुलीच्या पोटात दुखू लागले.

उपचारासाठी तिला घरच्यांनी वणी रुग्णालयात नेले असता, पीडित मुलगी दोन महिन्याची गरोदर असल्याचे समोर आले. त्यानंतर घरच्यांनी तिच्याकडे चौकशी केली असता तिने घडलेला प्रसंग सांगितला. दरम्यान, पीडित मुलीच्या तक्रारीवरून आरोपी प्रणव राऊत वर अत्याचार आणि पोक्सोसह विविध कलमानुसार गुन्हा दाखल करण्यात आला. पोलिसांनी आरोपीला ताब्यात घेतले असून याचा अधिक तपास मारेगाव पोलीस करीत आहेत.