राळेगाव तालुक्यातील खैरी येथील सरपंचासह चार सदस्य झाले अपात्र

गृहकराचा भरणा न करणे भोवले : ग्रामस्थांना करासाठी नोटीस पाठविणे पडले महाग

राळेगाव : गावातील ग्रामस्थांनी गृहकराचा भरणा केला नाही म्हणून त्यांना नोटीस बजावण्यात आल्या, असा आदेश देणाऱ्या सरपंच व ग्रामपंचायत सदस्यांनी स्वत:च कराचा भरणा केला नाही, ही बाब दक्ष ग्रामस्थांच्या लक्षात येताच त्यांनी जिल्हाधिकाऱ्यांकडे सरपंचाविरोधात अपात्रतेची कारवाई करावी, अशी याचिका दाखल केली. १० मे २०२२ रोजी अपर जिल्हाधिकारी यांच्याकडे दाखल याचिकेवर सुनावणीनंतर बुधवारी निकाल लागला. सरपंचासह चार सदस्यांना अपात्र घोषित करण्यात आले.

मागणी करून चौघांनी गृहकराचा भरणा केला नाही

■ ग्रामपंचायतीकडून गृहकराचा भरणा करण्याबाबतच्या नोटीस देण्यात आल्या. गावातील सर्व मालमत्ताधारकांना या नोटीस प्राप्त झाल्या. स्वतः ग्रामपंचायतचे पदाधिकारी व सदस्य असणाऱ्यांनी गृहकर्जाचा भरणा केला नाही. त्यामुळे त्यांच्या विरोधात महाराष्ट्र ग्रामपंचायत अधिनियम १९५९ कलम १४ अ नुसार याचिका दाखल करण्यात आली.

■ अपर जिल्हाधिकाऱ्यांनी सुनावणीत ग्रामसेवक खैरी यांच्याकडे अहवाल मागितला. त्यामध्ये संबंधित सरपंच व सदस्य यांनी गृहकराचा भरणा केला नसल्याचे पुढे आले. त्यावरून अपर जिल्हाधिकारी यांनी १६ ऑक्टोबर रोजी सरपंचासह चार सदस्यांना अपात्र ठरविल्याचा आदेश दिला.

ग्रामपंचायत सरपंच किरण तृशांत महाजन, पुष्पा गजानन इंगोले, उमेश अंबादास भारशंकर, मारोती बाबाराव दडांजे यांचे सदस्यत्व रद्द करण्यात आले आहे. खैरी येथील ग्रामस्थ गणेश चिडे यांनी अपर जिल्हाधिकारी यवतमाळ यांच्याकडे या चार सदस्यांविरुद्ध अपात्रतेची याचिका दाखल केली. या प्रकरणात अॅड. जयंत ठाकरे यांनी याचिकाकर्त्यांची बाजू मांडली. अपर जिल्हाधिकाऱ्यांनी ती ग्राह्य मानत त्यांना अपात्र घोषित केले.