*ऑनलाईन गेम चा सापळा धोका वेळीच ओळखा - अॅड. चैतन्य एम. भंडारी*

भारतीय वार्ता 

जगदीश का. काशिकर

कायदा (लॉ) / सुरक्षा / गुंतवणुक सल्लागार (कन्सलन्टंट) व मुक्त पत्रकार*, महाराष्ट्र. व्हाटसअप – ९७६८४२५७५७

पुणे: सध्या विविध सोशल प्लॅटफॉर्म वरून "गेम" खेळण्यासाठी आकर्षक अशा जाहिराती केल्या जातात. रिल्स समोर येतात. वाईट हेच की,अशा ऑनलाईन गेम खेळण्यासाठी प्रवृत्त करणाऱ्या जाहिरातीत अनेक फेमस नटनट्या काम करत आहेत. हे घातक आहे.

घरबसल्या ऑनलाईन गेम खेळून पैसे कमवा ! असं आकर्षण दाखवून या सापळ्यात ओढलं जाते.सुरुवातीला हजार पाचशे रुपये टाकल्यावर लगेच दीडपट किंवा दुप्पट पैसे कंपनीकडून दिलेही जातात. आणि तुमचा विश्वास मिळवला जातो. नंतर तुमचीही इच्छा (हाव) वाढते अन ते पाहून कम्पनी तुमहाला म्हणते  की पाच दहा हजार लावून पहा. जास्त रिटर्न्स मिळतील. तुम्ही तसे टाकून पहाता. आणि खरेच तेही जास्त टक्के दराने रिटर्न मिळतात. हे पाहून तुम्ही जास्त मोहात पडता आणि पन्नास हजार / लाखाच्या घरात पैसे गुंतवता. आणि तिथेच घोळ होतो. ती कम्पनी पैसे परत देत नाही. आणि तुमच्या लक्षात येते की आपल्याला त्या कंपनीचे धड ऑफिस पण माहित नाही. ना त्यांचा कॉन्टॅक्ट नम्बर आहे.

आणि कपाळावर हात मारून घेण्याची वेळ येते. घरबसल्या अशा पद्धतीने कमवायची (वाईट) इच्छा तुम्हाला कोणत्या थराला नेते. थोडेथोडके नव्हे तर चाळीस लाख रुपये एकजण घालवून बसलाय. घरदार शेती सगळं विकलं या गेम च्या नादात !

आता तुम्ही म्हणाल की, आम्ही नाही असल्या मोहात पडत. तर मंडळी नसाल पडत तर चांगलेच आहे. पण कधीकधी आयुष्यात मोठी आर्थिक अडचण आली की त्यावेळी ती गरज भागवण्यासाठी अशा ऑनलाईन गेम चा सहारा वाटू शकतो. अन त्या मोहात पडू शकता म्हणून मी सावध करतोय. अशा गेम मध्ये फसण्याची दोनच कारणे आहेत.

१) कमी कष्टात घरबसल्या जास्त पैसे मिळवण्याची हाव

२) ओढवलेली आर्थिक अडचण सोडवण्यासाठी अशा गेम चा सहारा वाटण्याची मानसिकता !

इमानदारीत केलेले कष्ट आणि त्यातून मिळालेले पैसेच तुम्हाला सुख शांती समाधान देतात. हे विसरू नका.यावर विचार करा आणि यावर मात करा,तुम्ही सुरक्षित रहा असे आवाहन सायबर अॅवरनेस फौंडेशनचे अध्यक्ष व ख्यातनाम सायबर तज्ञ अॅड. चैतन्य एम. भंडारी , सायबर अवेअरनेस फाऊंडेशनचे सदस्य धनंजय देशपांडे, पुणे यांनी तमाम नागरीकांना व जनतेला केले आहे.