रिद्धपुर येथे संविधान निर्माता डॉ. बाबासाहेब आंबेडकरांच्या पुतळ्याची विटंबना घटनेचे पडसाद : तालुक्यात तणाव

मोर्शी : मोर्शी तालुक्यातील रिद्धपूर येथे अज्ञात माथेफिरुने संविधान निर्माता डॉ. बाबासाहेब आंबेडकरांच्या पुतळ्याची विटंबना केल्याने काही काळ तणावाचे वातावरण निर्माण झाले होते.
दि. ३चे रात्री उशिरा रिद्धपूर येथील भारतरत्न डॉ.बाबासाहेब आंबेडकर यांच्या पुतळ्याचे विटंबना करण्याच्या दृष्टीने पुतळ्यावर काही रंग अथवा
ऑइल टाकल्याचे लक्षात येताच येथील जनतेमध्ये क्षोभ निर्माण झाला होता.

सकाळी त्या ठिकाणी आंबेडकरी जनतेचा जमाव मोठ्या संख्येने जमा झाल्याने काही काळ तणाव निर्माण झाला होता. मोर्शी चांदूरबाजार मार्गावरील वाहतुकसुद्धा काही काळाकरिता बंद करण्यात आली होती. परंतु ही घटना पोलिसांच्या लक्षात येतात शिरखेड पोस्टेचे ठाणेदार विक्रांत पाटील व मोर्शी चे उपविभागीय पोलिस अधिकारी निलेश पांडे यांनी तात्काळ घटनास्थळी भेट देऊन लोकांची समजूत घालून तात्काळ परिस्थिती नियंत्रणात आणली. चांदूर बाजार मोर्शी रस्त्यावरची वाहतूक सुरळीत केली. पुतळ्याची तात्काळ स्वच्छता करून जनतेच्या काही
मागण्या सुद्धा मान्य करण्यात आल्या. सध्या परिस्थिती नियंत्रणात असून घटनेचे गांभीर्य पाहता जिल्हा पोलिस अधीक्षक अविनाश बारगड
यांनीसुद्धा घटनास्थळाला भेट देऊन परिस्थितीचे अवलोकन केले व सहकार्य केल्याबद्दल रिद्धपूरच्या जनतेचे आभार मानले. सध्या परिस्थिती नियंत्रणात असून शिरखेड पोलीस स्टेशन पुढे लक्ष ठेवून आहे.