*मराठ्यांना ओबीसी प्रवर्गातून आरक्षण नको : नंदकिशोर वाढई* *ओबीसी काँग्रेसच्या वतीने निवेदनाद्वारे दिला तिव्र आंदोलनाचा इशारा*

*मराठ्यांना ओबीसी प्रवर्गातून आरक्षण नको-नंदकिशोर वाढई*

*ओबीसी काँग्रेसच्या वतीने निवेदनाद्वारे दिला तिव्र आंदोलनाचा इशारा*

✍️दिनेश झाडे

चंद्रपूर जिल्हा प्रतिनिधी

राजुरा :-महाराष्ट्र सरकार मराठा समाजाला कुणबी मध्ये समाविष्ट करून त्यांचा ओबीसी आरक्षणामध्ये समावेश करण्याच्या प्रयत्नात आहे परंतु महाराष्ट्र प्रदेश काँग्रेस कमिटी ओबीसी विभागाचा त्यासाठी कडाडून विरोध आहे. मराठा समाजाला आरक्षण मिळावे ही कॉंग्रेस पक्षाची भूमिका आहे. परंतु ओबीसींच्या आरक्षणाला धक्का न लावता मराठा समाजाला आरक्षण मिळावे अशी मागणी आहे. मराठा समाजाला ओबीसी प्रवर्गातून आरक्षण देऊन नवा संघर्ष महाराष्ट्रामध्ये निर्माण करण्याचा भाजपचा आणि आरएसएसचा कुटिल डाव आहे तो डाव आम्ही हाणून पाडल्याशिवाय राहणार नाही. असे झाल्यास ओबीसी समाज रस्त्यावर उतरून तिव्र आंदोलन करेल असा इशारा कळमनाचे सरपंच, ओबीसी काँग्रेसचे प्रदेश सरचिटणीस, अ. भा. सरपंच परिषदेचे विदर्भ सरचिटणीस नंदकिशोर वाढई यांनी उपविभागीय अधिकारी राजुरा यांना दिलेल्या निवेदनात दिला आहे.

         ते पुढे म्हणाले की, ओबीसी आरक्षणाची सद्यस्थिती पाहता ओबीसींचे सर्वच क्षेत्रातील आरक्षण आधीच धोक्यात आलेले असताना मराठा समाजाचा समावेश ओबीसी मध्ये करून ओबीसींचे आरक्षण पूर्णपणे जाण्याची भीती निर्माण झाली आहे. ओबीसींचे राजकीय आरक्षण काही जिल्हयांमध्ये २%, ५%, ८% अशा प्रकारचे राहिले आहे आणि या विरोधात न्यायालयीन प्रक्रिया सुरू असून सर्वच स्थानिक स्वराज्य संस्थांच्या निवडणुकाही लांबणीवर गेल्या आहेत. आरक्षण देण्या संदर्भात केंद्र सरकारने घटनात्मक दुरुस्ती करून ओबीसी आणि मराठा समाजाला आरक्षण दिले तरच ते न्यायालयीन प्रक्रियेत टिकेल अन्यथा मराठा समाजाला आरक्षण मिळणे शक्य नाही. मराठा समाजाला सुद्धा विनंती की आंदोलने, जाळपोळ, उपोषण करून आपणास आरक्षण मिळवता येणार नाही. केंद्र सरकारने घटनात्मक आरक्षण देण्यासंदर्भात पावले उचलली पाहिजे तरच मराठा तसेच ओबीसी समाजाला योग्य ते आरक्षण मिळेल. गेली कित्येक वर्षे ओबीसी समाज जातनिहाय जनगणनेची मागणी करत आहे परंतु केंद्र सरकार अशा प्रकारची जनगणना करण्यास व इम्पेरिकल डेटा देण्यास सकारात्मक भूमिका घेताना दिसत नाही जर जातनिहाय जनगणना झाली तर सर्वच समाजाला आरक्षण देण्या संदर्भात योग्य ती भूमिका घेता येईल.

      या प्रसंगी ओबीसी काँग्रेसचे प्रदेश सरचिटणीस नंदकिशोर वाढई यांच्या नेतृत्वाखालील शिष्टमंडळात दिनेश पारखी, धनराज चिंचोलकर, रामभाऊ ढुमणे, कुषणाजी भोयर, दिलीप गिरसावळे, राजु पिंपळशेंडे, संदिप आदे, योगराज आबिलकर यासह ओबीसी समाजातील अनेक मान्यवर उपस्थित होते.