*केंद्रप्रमुख विभागीय स्पर्धा परीक्षा पात्रतेच्या अटी शिथिल करा* *पुरोगामी शिक्षक संघटनेचे निवेदन*

*केंद्रप्रमुख विभागीय स्पर्धा परीक्षा पात्रतेच्या अटी शिथिल करा*

पुरोगामी शिक्षक संघटनेचे  निवेदन

वाशिम जिल्हा प्रतिनिधी: दामोदर जोंधळेकर

वाशिम :- महाराष्ट्र पुरोगामी प्राथमिक शिक्षक संघटनेच्यावतीने  केंद्रप्रमुख मर्यादित विभागीय स्पर्धा परिक्षा २०२३ साठी कार्यरत प्राथमिक शिक्षकांसाठी वय मर्यादा व अन्य अटी कमी करण्यासाठी राज्याचे शालेय शिक्षणमंत्री दिपक केसरकर, प्रधान सचिव शालेय शिक्षण विभाग, आयुक्त शालेय शिक्षण विभाग यांना प्रसाद पाटील राज्याध्यक्ष, हरिश ससनकर राज्य सरचिटणीस यांच्या स्वाक्षरीचे निवेदन पाठविण्यात आल्याची माहिती जिल्हाध्यक्ष इरफान मिर्झा यांनी दिली.

   महाराष्ट्र राज्य परिक्षा परिषद पुणे यांनी ५ जून २०२३रोजी प्रसिद्ध केलेल्या जाहिरातीनुसार केंद्रप्रमुख पदासाठी परिक्षा घेण्यात येणार आहे.मात्र यातील काही अटीमुळे कार्यरत प्राथमिक शिक्षकांवर अन्याय होत आहे. प्राथमिक शिक्षकांना सेवेत असतांना पदोन्नतीच्या अतिशय अल्प संधी उपलब्ध आहेत.सेवेत असतांना शैक्षणिक पात्रता वाढवून देखील त्यांना पदोन्नतीची संधी मिळत नाही आणि केंद्रप्रमुख पदोन्नती साठी उपलब्ध होत असलेल्या या एकमेव संधीमधील अटीमुळे ते या पदापासून वंचित राहत आहेत. या परिक्षा आयोजनात  खालील बाबतीत सुधारणा करण्यात याव्यात. सेवेत कार्यरत असलेल्या शिक्षकांसाठी ५० वर्ष वयोमर्यादा ठेवलेली आहे ती रद्द करण्यात यावी. पदवीला ५० टक्के गुणांची अट कमी करण्यात यावी. फॉर्म भरतांना पदवी कधी प्राप्त केली याआबाबत अट नसावी. अश्या मागण्या निवेदनातुम शासनाकडे करण्यात आलेल्या आहेत.